初冬柏林藝術散筆兼略提「烏托邦」展覽

一

現代人——拉圖（粵音鏬嘟）講得恰，“我們從未現代過”（劉鵬、安涅恩譯）。“現代”人，或者講，華人世界當今嘅洋化、現代化人已經走唔出洋華兩元中心主義合混以來所產生、附帶嘅類分方法。生活上嘅一切（藝唔藝術，文唔文化根本一啲都唔重要），如果冇被奇觀化，根本冇辦法成為商品，更冇辦法進而再轉化成利益。奇觀化(spectacularization）、商品化、制度化，乜化物化似乎係“現代”盲目“發展”嘅必然產物。筆者就正正係生命、生活奇觀化、商品化、制度化之中長大嘅。（“奇觀”係硬譯，拉丁文“specto”原意其實只係“吾觀”，所以“spectacularization”又或者可另硬譯為“表演化”。）

二

洋人世界入面，用半洋儒嘅視角去睇，“神”極少部分嘅“全能”可以話係“下放”到“個人”裡頭，同時“知識”、“真理”嘅製造權終始未有大量“下放”，法蘭西大革命（保皇黨或稱之法蘭西之亂）以來，“個人”的確係分享到越來越大嘅“自由”，但係“自由”必需喺“框架”存在嘅條件下先有辦法得以施行，而“個人”參與決定改變“框架”嘅權利仍然係少之又少，所以奇觀化後嘅藝術，同反叛、半反叛、非反叛等等嘅唔同程度反奇觀化嘅藝術，好似最後都淨係可以成為絕對“框架”之中絕對“自由”嘅裝飾品，奇觀化與否根本唔重要。

三

法蘭西感性大文豪賀浪迫（粵拼音baak1）、（國音羅蘭巴特）有大作《文之悅》。“悅”，《說文系傳統論》：“悅，猶說也，拭也，解脫也。”中文入面“悅”係主動定係被動嘅結果唔清楚，但係法文“plaisir”語源拉丁文“placeo”係“吾悅之”，本為主動。單單由法文原文標題到葡、英、德、波譯題，賀浪迫要講嘅文本快感就已經可以有唔同嘅理解：文本本身嘅快感、在於文本嘅快感等等。對文本（呢度順帶延伸到其他“嘢”）能夠產生快感可以話係戀“物”狂，法文“fétiche”來源於洋人殖民擴張史，在此不贅述，同樣又係源語拉丁文，“facticius”（人造的），又證之戀物係人為；順便又聯想到歐洲以知識在後殖時期繼續擴張嘅根本，筆者將之幻想為對“未知”嘅“戀物化”，“戀物化”可以確保知識生產時得益於精神上、甚至宗教式信念而提高嘅“質量”。另外，“文之悅”又令筆者諗起電影都有類似嘅知識“情慾化”(eroticization）。

四

好多時，洋文文本譯入中文之後，都會被“菁英化”，本來係作者刻意用到嘅日常用語，都會被譯成為較為文雅，甚至係難明嘅用字，但係呢種“菁英化”可以講係別無他選。因為華洋語文大不同，唔同語言翻譯嘅對應組合，簡單來講係數學遊戲，譯文“菁英化”，繼而令中文洋化貼近原文，某程度上其實不過係求便利。

五

賀浪迫生前（接受電台訪問果陣）講過鍾意字典式嘅“絮文”，筆者將之理解為“文字嘅碎片”。文字作為各種“文明”嘅主要成分，甚至係“神聖”嘅載體，其實就係知識生產入面權力甚大嘅“框架”、“規條”。中文有“上文下理”嘅講法，拉丁文“cohaerentia”喺多種現代歐洲語文中有“倫次”嘅意思，但係“cohaerentia”其實本身都不一定絕對限於各種各樣嘅“倫”、“次”。“語無倫次”本身就係一種“倫次”，“cohaerentia”終極語源“cohaereo”嘅其中一個詞義就正正係“吾成於”，“我組成於”。

六

筆者參與創作、聯展、策展嘅“柏林風景中的烏托邦”，唔完全可以話係有自誇“亂中有序”嘅企圖，反而係明知無法擺脫等級觀念、現實又甘願屈服嘅結果：首先係確認“亂即序”嘅想法，但最終都要被迫／欣然接受展覽／文章標題係常規內無有效辦法打破嘅傳統，的而且確“主題”作為知識生產、傳播入面嘅“權力”實在太大，但係人類古代詩歌、圖畫“無（標）題”，﹝但（實則）有（／強加主）題﹞，或者可以為“現代”人對“主題”、“標題”嘅宗教式順從有“新”嘅“啟發”。

七

因為咁，收到“柏林風景中的烏托邦”戶外活動未獲柏林市政廳贊助時，決定說服筆者所在藝術家共同體“Arbeitspause”（暫譯“工作嘅休息”）嘅其他成員繼續呢個initiative，要令職業藝術家無償辦展，一起首就要證明利大於弊，不過亦都要保證在最少工作量付出嘅同時，展覽要有主觀上一定嘅“質量”。一開頭的確係被共同體創始成員瑪塔・薩拉（Marta Stanisława Sala）意氣咁怒斥免費提供作品，甚至係創作“不符合職業道德”，畢竟柏林眾多藝術家為生活困難，越來越得到關注。敝展開幕前一日，筆者同薩拉一齊去咗柏林畫廊(Berlinische Galerie）嘅“階級問題”(Klassenfragen）藝術展嘅開幕禮，主管文化嘅柏林副市長克勞斯．萊德雷克(Klaus Lederer）有作開幕演講，承認柏林藝術家遠遠未收到應有嘅保障。畫廊全名係“柏林畫廊．現代藝術博物館”，喺咁樣“典堂級”嘅場地做“階級問題”藝術展覽絕非易事，當中涉及唔少表徵(representation）上嘅問／議題。開幕嗰日，筆者心情有些少激動，要之後再三觀展、考察後方能作初步定論。

展覽

藝術展覽“柏林風景中的烏托邦”( Utopische Interventionen in Tempelhofer Landschaften）由柏林藝術家共同體“Arbeitspause”策劃，成員包括瑪塔・薩拉、約翰娜・希哈特(Johanna Reichhart）、馬科斯・加西亞・佩雷斯(Mar cos García Pérez）、卡塔基納・薩拉(Katarzyna Sala）和筆者，獲柏林合作社論壇(Berliner Genossenschaftsforum）場地和藝術書籍印刷贊助。

論壇是德國京畿，即柏林同勃蘭登堡兩州近五十個住宅合作社組成的聯會，是次展覽場地由論壇的常設展覽會所借出，展期由二二年十一月底起至二三年一月底結束。“柏林風景中的烏托邦”旨在向柏林和國際藝術家提供合作和交流的機會，以烏托邦為主題，探討藝術作為傳播媒介中溝通的可能性，策展的理念在於自由不受拘束，卻同時是現實面對有限的預算和時間內表達藝術家不同的聲音、訴求和期許。其他參展藝術家包括Aleksandra Idzikowska、Angelika Kuzera、德博拉．烏德(Deborah Uhde）、Harshini J. Karunaratne、Hengame Hosseini、星野早紀、詹姆斯．巴斯卡拉(James Bascara）、柳家茄、區智聰(Jorge Veiga Alves）、李卓媚、劉佩鑫、Marta Bączyk、Melo Börner、姚露欣、鍾依琳、吳方洲、Rusnė Dragūnevičiūtė、Sarapata、徐欣羡（按拉丁字母排序），以及其他的影片協製成員、演員等。